روت ريم محمد أحمد، طالبة الثانوية العامة بمحافظة البحيرة، تفاصيل حصولها على مجموع 4% في امتحانات الثانوية العامة، قائلة: “فوجئت بأن مجموعها 15 درجة من 320 رغم أني من الطالبات المتفوقات طوال سنوات الدراسة”.

وقالت في مداخلة هاتفية مع الإعلامية نهال طايل ببرنامج " تفاصيل"، والمذاع على فضائية “ صدى البلد 2”، إنها فوجئت بأن مجموعها لا يتجاوز نسبة 4%، بعد أن كانت تتوقع الحصول على مجموع مرتفع نظرًا لمستواها الدراسي طوال العام.

وأضافت: "أنا مش عارفة إزاي ده حصل، أنا كنت متوقعة نتيجة مختلفة تمامًا، لكن لما دخلت على الموقع ظهر لي في البداية مجموع 92.4 من 100، ودا رابط صحباتي بعتوه ليا أول ما دخلت على الموقع ظهر الاسم والمجموع والجهاز عمل ريستارت وخرج، ولما حاولت أدخل مرة تانية مفتحتش معايا".

وأوضحت: "دخلت على المواقع الإخبارية، لكن مفيش حاجة فتحت معايا، لحد ما أصحابي وقرايبي قالولي إن النتيجة ظهرت وقالوا ليا أنا جايبة 15 من 320 يعني 4%، وده شيء مش طبيعي، ودا مستحيل يكون مستوايا".

وعن نتائج زملائها، قالت: "كل زمايلي الحمد لله جايبين مجاميع كويسة ومستواهم كويس جدًا، لكن بالنسبة للنتيجة بتاعتي أنا مسمعتش عنها قبل كده، أقل حاجة كنت بسمعها كانت 50% أو 40%، لكن 4% دي حاجة محصلتش خالص".

وتابعت: "أنا محتاجة أشوف ورقي وأعرف إيه اللي حصل، وأشوف هل الدرجات دي فعلًا درجاتي ولا لأ، أنا كنت متوقعة أجيب فوق الـ90%، وحتى لو حصل أي ظرف كنت متوقعة أقل حاجة أكون 85%، لكن النتيجة دي حاجة مش طبيعية".